東京奧運男子100米及200米背泳金牌、4×200米自由式接力銀牌得主,嚟自俄羅斯嘅雷洛夫(Evgeny Rylov),早排因為戴貓貓口罩上台攞牌,成為全球知名嘅貓奴。近日雷洛夫凱旋回國,接機嘅女友同埋粉絲全部戴晒貓貓口罩,場面溫馨得黎都幾cute㗎!
雖然疫情期間,喺機場錫錫都要隔住個口罩,但因為口罩上面有非常具體嘅貓咀,睇落係幾似兩隻貓嘅錫錫。雷洛夫之所以想戴貓貓口罩領取獎牌,原因好簡單,就係佢真係好鍾意貓㗎!不過佢第一次奪金嗰陣,俾大會阻止佢戴貓貓口罩上頒獎台,佢更一度表示「想哭」!不過到咗第二次攞金牌嗰陣,佢就索性喺影相時間戴上貓貓口罩,終於成功實現「貓奴的願望」。
雷洛夫IG仲有張相,喺佢戴貓貓口罩攞金牌一刻,側邊key左隻戴住「人面口罩」既貓貓,真係超搞笑!
作為貓奴,IG當然要有同主子一齊嘅合照啦。不過唔知點解,好幾個post都係冇著上身衫嘅。有貓又show肌,絕對係吸like方程式,睇黎雷洛夫除咗游水超叻之外,玩IG都有啲心得。