各位自己友應該都試過趕Deadline要交嘢比客,間唔中整咗啲好廢嘅設計出嚟,今次同大家分享一個廢到笑嘅設計,就係「打死蚊子印章」,可以隨手印出一隻拍死咗嘅蚊,到底呢個設計可以有咩用?一齊睇吓VILLAGE VANGUARD嘅示範啦!
唔知設計師係咪因為夏天成日俾蚊咬,拍極又拍唔到隻蚊,一時嬲得滯就整咗呢個設計出嚟。VILLAGE VANGUARD示範將印仔印喺手掌、手臂上面,遠睇真係有啲似拍死咗隻蚊。雖然現實拍唔到蚊,繼續俾蚊咬,但係心理上好似都好過啲?
除咗人喺自己隻手上面之外,仲可以印喺人哋手臂上面,整蠱對方等佢以為有隻蚊,嚇佢一條!仲有人會印喺筆記簿上面,如果再用紅筆加多少少血跡俾佢,應該會更加似一隻拍扁咗嘅蚊。
睇嚟設計師呢個夏天都比啲蚊咬到好崩潰,大家又諗唔諗到用印仔可以用喺邊呢?想買呢個印仔嚟玩吓嘅自己友,可以Click入網站,每個售價1650日元(含稅)。
圖片來源:VILLAGE VANGUARD