以為自己友唔使出街做嘢?分分鐘仲辛苦過打工仔!一落8號波就返工係香港人嘅常態,不過水浸到去條腰度,仲要繼續做嘢,大家又試過未?日本有個音樂會遇正暴雨,台上嘅偶像繼續跳,台下嘅攝影師繼續影,真係好敬業啊!
日本山梨縣星期日落大雨,但戶外音樂會拍攝都係要繼續。有觀眾影到積水已經深至攝影師腰間,攝影師「山村波特」(@pote_yamamura)下半身都浸晒喺啲水入面。不過音樂會未叫停,台上嘅偶像繼續笑住跳舞,攝影師包住部機,另一隻手拎住條梯,繼續拍攝台上表演。
最終大會以安全為由終止活動,網民都話攝影師非常敬業。佢之後回應話,自己係用毅力同埋體力做賣點嘅攝影師,歡迎各位客仔搵佢啊!有人講笑話個攝影師可能係自己友,唔開工冇錢收,真係手停口停啦!