各位自己友用左咁耐Safari，係咪真係了解每個功能呢？今次為大家介紹五個使用秘技，教大家點樣定時熄分頁、快速搵返唔小心交叉左嘅網頁、飛走網頁嘅廣告，等大家用得更加得心應手。
一次過關閉所有分頁
開咗好多個網頁喺度，要逐個交叉好麻煩，原來長㩒右下角嘅「分頁制」，就會彈出一個選項，俾你一次過關閉所有網站。
如果手動關閉網頁都覺得好麻煩，可以入去設定，揀「Safari 」，再揀「關閉分頁」，就可以揀一日後、一星期後、或者一個月後自動關閉分頁。
快速搵返唔小心閂咗嘅分頁
只要撳右下角嘅「分頁制」，在場咁中間嘅「+」，就會顯示返頭先關閉過嘅所有分頁，等大家輕鬆搵返唔想要嘅網站。
快速睇返瀏覽記錄
如果只係想睇返上一個睇過嘅網站，就㩒上一頁好簡單。但如果想睇返上上上個網站又點算好？原來只要長㩒「上一頁」就可以搵返頭先睇過嘅網站。而長㩒「下一頁」就可以睇到之後嘅瀏覽記錄。
將常用網站加到主畫面
各位自己友如果想方便啲睇「手停口停」，可以用呢個方法，㩒一下「分享鍵」，將網站加到主畫面，就會變到好似一個app咁，大家喺主畫面㩒一下就嚟到「手停口停」嘅網站啦！
閱讀模式飛走廣告
睇睇吓文成日唔小心撳入啲廣告都幾煩，原來只要用閱讀模式就可以飛走啲廣告。撳一下左上角「大小」嘅制，再撳「顯示閱讀器顯示方式」，就會得返啲圖同埋字，冇晒廣告㗎啦！大家仲可以自己較字型、大細同埋顏色，用一個最舒服嘅版面嚟睇文。
