中國對於用字嘅審查有幾嚴格，相信大家都唔陌生。不過有網民發現，中國出產嘅手遊竟然連「瘟疫」兩個字都唔用得。製作團隊就用「痔瘡」代替，搞到劇情超級好笑，唔知係咪另類嘅宣傳手法呢？
換裝手遊《時空戀結》引來好多網民關注，連製作團隊都出嚟解釋話，當時只係因為「瘟疫」呢個字過唔到審查，就換咗做「痔瘡」，冇諗過引嚟咁大反應，亦都冇諗過有人真係睇劇情，點知又引來更大迴響，仲話「我本人絕對絕對絕對冇痔瘡！！！」。
用「痔瘡」代替「瘟疫」之後，搞到啲劇情好搞笑，遊戲入面嘅角色「蕭遠」話12歲嘅時候，佢住嘅小山村，爆發左一場「痔瘡」。
佢又話患上「痔瘡」嘅人，等於宣判左結果，只能靜靜受折磨等死。
佢仲話嗰個時候患咗「痔瘡」，周身唔舒服。佢嘅乳母仲話就算犧牲自己同埋自己個仔，都一定要讓皇子嘅「痔瘡」好返。（真係好偉大…）
仲有一句金句係，「親身經歷的我並不覺得痔瘡可怕，人心比痔瘡更可怕。」佢又真係講得冇錯喎！
有網民話，「人生比痔瘡更可怕」真係一句金句，非常認同呢句說話。更加有網民因為「痔瘡」想download個遊戲來玩下，仲建議其他遊戲同劇本都應該參考。
