上次教咗大家五個iPhone Safari嘅秘技，今次再教大家五招更加實用嘅技巧，包括翻譯網站內容、喺網頁搵關鍵字、lock screen繼續播YouTube等，快啲學識佢做嘢更加方便。
收埋工具列
有時想專心啲睇文，工具列都幾阻住，唔小心揩到又會彈咗出去。只要㩒「大小」、再㩒「隱藏工具列」，就可以鎖定工具列收埋佢啦！
切換為電腦版網站
雖然而家大部份網站嘅設計都有手機版，不過有啲網站嘅嘅手機版功能就唔夠網頁版咁齊全。網頁版唔一定電腦先有得用，只要㩒左上角「大小」、再㩒「切換為桌面版網站」就得。
翻譯網站內容
要翻譯網站嘅內容唔使成篇copy去Google Translate，只要係iOS 14最新版本，就可以㩒「大小」、再㩒「翻譯成簡體中文」，就可以將英文網站變咗做中文。依家可以翻譯嘅語言包括英文、西班牙文、法文等。
快速搵網頁內想要嘅內容
喺電腦想搵網頁內嘅關鍵字，我哋會用crtl + F快速搜尋。手機都一樣有呢個功能，第一個方法係入咗網頁之後，喺最上面嘅搜尋打想要嘅關鍵字，就會搵到呢一個網頁有幾多個你想搵嘅關鍵字，仲會用黃色highlight左。
第二個方法係㩒「分享」，再㩒「在網頁中尋找」，就可以打想搵嘅字。
熄咗個mon都可以播YouTube
喺Safari 開咗YouTube之後，用返頭先轉換做桌面版嘅方法，就可以開始播片，唔好關閉網站就咁掃返出去主畫面。之後再拉返控制室嘅版面出嚟，㩒一下影片播放器繼續播，就可以keep住聽歌啦！
