雖然話藝術嘅嘢好難用價錢衡量，不過如果你俾咗60幾萬港幣，只係攞到兩個空白嘅畫框，你又接唔接受到呢？
丹麥奧爾堡現代藝術博物館（Kunsten Museum of Modern Art）就借咗65.3萬港元比藝術家哈寧（Jens Haaning），用嚟翻新兩件用錢整成嘅藝術品，擺喺一個義工作為主題嘅藝術展「Work it out」，展期係9月24號去到下年1月22號。但哈寧最終喺9月23號先交兩個空白嘅畫框，將作品命名為「攞咗錢就走」（Take the Money and Run），話想鼓勵其他人審視自己工作待遇喎。
大家可能會覺得好荒謬，咁就叫交咗貨？原來哈寧本身係要用丹麥克朗銀紙同埋歐元填滿個畫框，表達丹麥同埋奧地利嘅平均年薪。原本合約寫明，其中53.8萬丹麥克朗係用喺作品上面，其餘2.5萬克朗就係哈寧嘅報酬。博物館就話哈寧違約，叫佢1月14號前要還返筆錢，如果唔係就會考慮告佢。哈寧就反駁話，違約都係藝術品嘅一部份，仲話如果有人錢太多想送錢比人，願意再接受邀請。
到底哈寧會唔會還返筆錢，博物館又告唔告到哈寧呢？一切都係未知之數，不過奉勸各位自己友食吓花生就算，千祈唔好交啲空白嘅作品俾客仔啊！
