近年多咗好多人玩返菲林相機,不少新手行入菲林舖,見到咁多林林總總嘅菲林底片都會無從入手唔識揀。今次等小編介紹幾款最新手常見嘅菲林,當係俾大家認識下啦!
Fujifilm 業務用
影菲林其中一個最燒錢嘅點係買菲林,呢款由日本富士出品嘅業務用,係價錢相當健康嘅選擇。相片特色方面,佢無論對比度、顆粒度都屬於比較平均,色調偏冷,簡單平凡又帶點日系,都幾適合影大部分場口㗎。
Fuji C200
另一款實惠選擇,色水鮮艷得來帶點富士標誌嘅偏黃綠,影風景時好多人追求嘅清淡菲林tone就係呢種!
Fuji Superia x-tra 400
藍色還原度爭啲喇,至於充足光線下影人像膚色還好,光線稍暗淡時就有機會出現偏綠,但整體發揮都穩定,顆粒感都較同一ISO嘅幼細,影人像最適合不過。
Fuji Superia Premium 400
與x-tra係同一系列,顆粒同樣夠細,高對比度同飽和度令佢色澤更濃,影出嚟嘅膚色夠紅潤細緻、又唔會妖艷。
Kodak Portra 400
格調柔和輕盈、顆粒幼細,色調暖兼質素穩定,專業攝影師都用佢,鍾意影人像嘅認住佢喇。