依家每日咁多確診個案,周圍都好高風險,萬一要去隔離執嘢又得幾個鐘,有啲咩就一定要執齊?如果唔係隔離嗰10幾日,大家就真係手停口停啦!
1.電話卡
上網對自己友嚟講幾乎係日常生活唔少得嘅一環,要確保上網穩定,隨時隨地可以做嘢,買定幾張電話卡,就算一個台收唔到都仲有另一個台。
2.拖板
自己友平時咁多電子產品要叉電,隔離嘅地方未必有咁多插頭,帶定拖板就可以確保啲電器有位叉。
3.手提電腦、平板電腦
冇咗手提電腦或者平板電腦又點做嘢呢,梗係記得要帶啦,仲可以用來睇Netflix、YouTube,等時間過得快啲。
4.叉電線
買定唔同頭嘅叉電線,無啦啦咩型號嘅電子產品都差到啦。
5.尿袋
雖然有插頭叉電係好方便,但準備定尿袋以備不時之需都好緊要㗎,等緊去隔離酒店嘅地方,分分鐘要等好耐,有尿袋就唔怕手機冇電啦!
6.耳機
無論用嚟做嘢、聽歌定係睇戲都係必備,等自己做嘢專心啲,唔使怕人哋騷擾你。
7.手機轉換器
想將手機畫面駁落電視,帶一條手機轉換器就一定唔少得啦,個Mon 大啲睇戲都爽啲。
8.迷你煮食電器
大家見過隔離派嘅飯盒,都知質素好參差,去到其他地方煮嘢食未必好似屋企咁方便,帶個迷你煮食器,簡單煮個麵又得、煮個飯都得,就唔使驚餓親啦!