肺炎疫情下出少啲街當幫忙,留返喺屋企唔好增加醫護人員嘅負擔,無得出去睇戲,留喺屋企睇Netflix一樣咁歎!今次為自己友整理咗Netflix刺激動作片嘅link,仔細分類咁就唔使睇嚟睇去都係嗰幾套,更加容易搵到啱心水嘅戲啦!
首先為大家介紹嘅喺Netflix原創動作電影《驚天營救》,由「雷神索爾」基斯咸士禾夫、《怪奇物語》大衛哈伯,點擊率已經接近一億,大家可以喺動作驚悚片(43048)搵到呢套戲。
今次「雷神」飾演男主角Tyler Rake,唔做「雷神」轉做黑市僱傭兵,任務喺要拯救被毒梟綁架嘅兒子。
唔好以為Netflix原創電影就普普通通,呢套戲最大討論點就係電影接近37分鐘嘅位置,加插左一段超過11分鐘一鏡到底嘅動作戲,呢段戲非常有睇頭!鏡頭穿插大街小巷,大家好似企喺男主角側邊同佢一齊埋身肉搏。動作戲拳拳到肉,連拍開動作戲嘅「雷神」都話好有挑戰性,唔喺講笑,小編都睇到戰戰兢兢,完全唔敢抖大氣添!
除咗激烈嘅動作戲之外,電影亦都收埋唔少感動位,片尾男主角中槍血流如柱,生死之間帶出男主角對人生嘅反思,結局係點呢度就唔劇透啦!留返俾大家自己欣賞呢套今年必睇嘅動作戲,無睇過點同人討論啊?
講到刺激嘅動作片點少得充滿速度感嘅飛車戲,如果你喺《狂野時速》嘅忠實fans,又已經睇晒咁多集想搵啲新意思,可以㩒入去動作喜劇(43040)睇吓《寶貝神車手》。
呢套戲嘅劇情非常有心思,大家欣賞飛車效果同埋街頭重火力警匪槍戰之餘,記得留意埋劇情細節,將男主角Baby嘅內心世界描述得淋漓盡致。
男主角Baby因為車禍造成嚴重耳鳴,所以經常用耳機播放強勁音樂,減低不安感。正因為咁全套戲都穿插住80年代流行歌曲,充滿懷舊氣氛,與緊張刺激嘅動作戲互相配合,效果又幾好喎!
除咗呢兩套戲之外,Netflix仲有好多驚險刺激嘅動作戲,隨時睇到大家腎上腺數飆升,小編已經幫大家分好類放喺下面,呢排就乖乖地留喺屋企睇戲啦!