8月日劇有咩睇?雖然近排疫情有啲回落嘅跡象,但係希望大家都唔好鬆懈,盡量少啲出街!為咗gang gang唔敢出街、決定繼續留喺屋企煲劇嘅大家,今日就介紹下8月其中幾套受歡迎嘅日劇,希望可以俾到多個選擇你哋啦!
【一】《盛夏的少年》- 自由 x 領悟
劇集主要講述喺富室町長大嘅瀨名悟(佐藤龍我 飾)、風間龍二(岩崎大昇 飾)、春日篤(浮所飛貴 飾)某一日突然遇到由第二次世界大戰期間,穿越嚟到現代嘅軍人三平(博多華丸 飾)。相處咗一段時間之後,三平認為雖然而家喺自由嘅時代,但就唔係每一個人都係自由咁生活緊。劇中包含唔少時事元素,包括因為疫情而有部份學生要online learning、怪獸家長、校園欺凌等等。而當中亦包括香港人示威、抗爭嘅畫面,相信大家喺睇嘅時侯一定會有更加大嘅共鳴同埋感同身受。
過去呢一年,相信都多咗好多人問「真正嘅自由到㡳代表啲咩?」一於透過睇下主角佢哋同三平之間嘅相處同生活,一齊開始尋找「幸福」同「自由」嘅真正定義!
首播日:7月31號
【二】《寵女青春白皮書》- 父女x青春x人生
劇集講述小說家小比賀太郎(室毅 飾)嘅妻子小比賀幸子(新垣結衣 飾)因病過世之後,同寶貝獨生女小比賀櫻(永野芽鬱 飾)一齊過住和睦嘅父女生活。直至櫻高中畢業之後,由於作為爸爸嘅賀太郎太過寵愛佢同擔心佢喺男女同校嘅生活方面會唔適應,決定要陪佢一齊考入同一間大學、參加唔同嘅活動!
想睇新垣結衣做媽媽嘅身影?想知道究竟一個40歲嘅爸爸仲可唔可以適應社團活動、聯誼、文化祭、打工等等嘅大學生活同埋青春文化?同櫻之間嘅父女感情又會點樣發展?咁就記得睇啦!
首播日:8月2號
【三】《妖怪合租屋》- 失意x成長
《妖怪合租屋》講述女孩目黑澪(小芝風花 飾)因為俾男友欺騙而冇咗原本份工,就連住嘅地方都冇埋。誤打誤撞之下去咗一間合租屋同其他人一齊住,但係半夜起身嘅時候唔小心發現咗其實間屋嘅所有人原來都係妖怪!究竟同妖怪嘅相處、生活係點?過程入面又會領悟到啲咩?
雖然套劇好似有啲恐怖,但其實都係喜劇成份比較多。喺屋企抗疫覺得悶嘅時候,都不妨睇吓女主角點樣學識從失意中慢慢成長,話唔定都可以幫到大家!
首播日:8月1號