「死啦啲青春痘⋯⋯」呢句說話冇返咁上下年紀都冇聽過。雖然話上咗年紀仲有青春痘爆可能係值得開心嘅事,但係要除低口罩見人時都醜怪豬㗎嘛。面對暗瘡,犯賤嘅人類明知徒手唧瘡會細菌感染之餘,又會留疤,但偏偏見到暗瘡都係要郁手唧。唉!唯有指點下你哋唧暗瘡嘅技巧。
頭盔:適用於戴口罩焗出瘡,或偶爾爆一兩粒嘅人。效果因人而異,有疑問就去諮詢皮膚科醫生意見先。
第一式:手下留瘡
好多人見到粉刺或者油脂粒啱啱生出嚟,就算喺街度都好手痕想殲滅佢,要忍手呀!因為呢個時候係滅瘡好時機,喺佢未進化到大孖瘡前就要搽藥膏撳住佢,唔好亂搽其他嘢、唔好搞大佢。瘡冇大到就係世界冠軍!
第二式:撳唔住喎點搞?
當終於養到暗瘡成熟時、含埋白膿嘅時候,就要準備滅瘡!(利申呢個係小編平時用開嘅方法,大家量力而為)
- 首先消毒好一枝冇生鏽嘅針,同埋自己雙手,特別係手指。
- 然後用針輕輕刺穿暗瘡表層,等佢可以有一個油脂流出嘅固定出口。
- 再就住力用手指尖(唔係指甲!)擠壓兩邊,粒白頭咇一聲出咗嚟就完成啦Yeah!
第三式:發炎/養唔大喎點搞?
如果你粒瘡瘡發炎,腫到同家燕媽媽粒標誌差唔多;又或者粒瘡瘡等極都谷唔出,生得好深層,又唔紅唔腫,咁好有可能佢係石頭瘡。
呢兩個情況都唔可以再掂佢,一嚟會將細菌擴散,搞到第度一齊生瘡;二嚟石頭咁你唧到咩!唔識搞就搵醫生啦!
第四式:健康生活習慣
爆咁大粒瘡仲唔勤洗面、清潔返毛囊呀?如果發現自己嚟嚟去去都係同一個位生瘡,證明嗰個位油脂分泌特別旺盛,平時要護理多啲喇。
仲要記住健康飲食、定時作息!繼續食油膩刺激性食物、飲凍嘢又夜瞓,我幫你搵定Jackeline都得喇。
希望大家除低口罩相見時,繼續標青beautiful,個樣令人羨慕~