做得呢行時間仲係同身邊朋友錯開，忙緊佢哋就休息，我休息就佢哋好忙。要消遺時間就拎起部switch，尤其上年仲出咗Lite版，獨獨一個人拎埋出街都好方便！唔好以為玩得switch就一定係成班朋友一齊先玩得，一個人玩都可以好開心，推薦幾款一個人都可以enjoy又kill time嘅遊戲！
1. 動物森友會
喺香港地講買樓起地真係好難，但係動森成個島都係你話事！你可以將腦中嘅世外桃園建設喺動森入面，起屋、種果樹、釣魚、捉蟲、潛水等，任你發揮創意，創造一個屬於你嘅島！真係一個唔覺意就玩咗2,3個鐘。
2. Super Mario Odyssey
呢隻game可以話係任天堂嘅經典之作，由NDS時期嘅2D版，到而家switch版嘅3D，精美嘅畫工同流暢感，玩落真係好爽。個感覺就好似環遊世界，總共有15個國度，用頂帽去控制，目的要救返公主出嚟！如果你有強迫症，掛住收集月亮同唔同國家貨幣，真係已經可以玩好耐，係絕對值得收藏嘅遊戲。
3. 路易吉洋樓3 （Luigi’s Mansion 3）
主角係Mario嘅細佬Luigi，背景喺佢被邀請去一間酒店度住，結果佢嘅朋友俾人捉咗，困喺畫入面，Luigi就要負責去酒店嘅每一層打敗幽靈救返朋友出嚟。操作簡單，破關都唔算好難，如果真係卡住好耐網上都有好多攻略參考，一層層咁破關真係好有滿足感，同Super Mario Odyssey一樣每層都有鑽石，強迫症嘅朋友又可以玩耐啲啦！
4. 薩爾達傳說 曠野之息
又係另一款巨作，身邊嘅朋友甚至為咗佢而專登買switch玩，成個地圖有成100幾座神廟，透過破神廟去解鎖劇情，自由度高。不過個人覺得難易度偏上，要有心理準備，打神獸死5,6次都好閒，要俾啲耐性去玩，最適合鍾意探索冒險嘅朋友玩。
5. 牧場物語 重聚礦石鎮
呢個係我嘅私心推介！以前由朝到晚就拎住部NDS玩牧場物語，真係懷緬童年回憶之作！牧場物語同動物森友會都係異曲同工之妙，都係要落手落腳種田掘曠賺錢，不過唔同在於你要主動去搵唔同嘅角色去觸發劇情，建議大家可以上網睇睇攻略，玩玩下就會有另一番劇情出現，唔使花時間自己慢慢搵！
由其而家疫情，未必可以去café做嘢換換環境，想休息自己玩switch都樂趣多！雖然話就話係單人game，但除咗牧場物語同薩爾達傳說以外，都係可以連線同朋友玩，等星期六日一齊玩又有另一種樂趣！
