消費主義之下，生意佬總會諗盡所有辦法令你買嘢，有時候畀少少discount大家都會去搶。買到最後發現屋企啲櫃桶堆滿晒唔用嘅嘢，再搵深啲可能好多都過期仲要冇咩用。Minimalism極簡主義喺日本興起，主張所有東西夠用就得，唔需要多。睇下佢嘅概念會唔會令你改變自己生活呢？
1. 對數量有概念
極簡主義下，數量係好重要，數量唔多，但係每一件物件都係有用處，要抱住買一樣嘢就要捨棄一樣嘅原則。當你需要某樣物件就馬上搵到，因此收納空間喺極簡主義下再唔係必需。整個空間都會變得乾淨利落。
2. 經典為原則
上面提過對數量要有概念，有時買嘢就係總會諗到某樣嘢係某場合有用，呢件衫係咩事可以著，慢慢堆積落嚟，全部都冇用過。認真咁諗，去到唔同場合，大多數都係著返啲經典款、安全色，所以極簡主義中，購買所有物件都要以經典為主。
3. 重視個人喜好
成日都會有人問「世界末日你只可以帶3樣物件走，你會揀邊幾樣？」，極簡主義下同樣，你會正視自己嘅喜好，例如咩色咩衫會成日著，咩鞋你係最鍾意，往後你要做選擇都容易，因為你了解自己，減輕咗好多不必要嘅煩惱。
4. 斷捨離
成日聽到呢個名詞，但真係做到嘅人有幾多呢？做到斷捨離先係極簡主要嘅第一步，斷開不必要嘅慾望，捨棄你唔需要嘅嘢，離開對物件嘅執著。又唔需要一下子嚟個大執屋，斷捨離唔單止物品上嘅減少，最重要係內心脫離對物件嘅執著，內心未做好準備，好容易一下子又買返晒所有嘢，咁係最差嘅反彈。
大家都習慣咗繁重嘅環境生活，不知不覺買嘢成為咗解脫壓力嘅一部分，或者唔需要去到最簡嘅生活，試下買嘢前諗下自己需唔需要，屋企仲有冇類似嘅嘢代替，都係極簡生活好嘅開始。
