又到月尾，好多人手頭摱摱緊就會選擇煮埋聽日嗰餐。英國一間大型連鎖超市Asda調查發現，差唔多七成半英國人話覺得尋晚餐飯仲好食。但原來呢個諗法並唔係都市傳說！因為研究發現一啲食物喺烹煮後24個鐘會變得更好味。
過去半年嘅疫情間，英國人習慣一次過煮多啲嚟分幾日食，當中最受佢哋歡迎嘅隔夜飯Top 5，分別係：咖喱、法式砂鍋焗嘢、pizza、辣豆醬、肉醬意粉。
有牛津大學食品科學家就解釋喺烹調過程中，會同時發生一定數量嘅反應，令第二日嘅餸菜變得好味；尤其係咖哩包含多種食材同香料，本身又係濕濕地，所以雪佢成晚味道就會散佈得更平均，而調味料同肉嘅接觸時間變長，就醃得更入味。佢又話因為翻熱嘅時候咖喱醬會由啫喱狀融化成醬汁，所以口感會變得更加滑～
不過食隔夜餸都要食得安全，有英國嘅大廚就分享咗5個食物保鮮貼士：
1. 一定要攤凍佢！熱嘅食物放入雪櫃前要完全攤凍，唔係就會滋生有害微生物，分分鐘食到你攪肚痛～
2. 不論係雪櫃定冰格，總之唔會3-4日內再用嘅食材一定要雪！
3. 幾時都要完全翻熱啲食物，唔好熱啲唔熱啲！大部分食物都適合用微波爐翻熱，焗爐就比較適合翻熱焗薯等等，一啲湯汁等液體類食物都可以開火煲返熱佢㗎。唔肯定就用微波爐啦！
4. 將一啲唔用住嘅香草mix埋牛油或其他食油，再放入冰格雪住備用，之後煮咖喱、肉醬等等就可以更好食。
5. 就算係生蛋黃雪入冰格都可以重覆用，可以加少少濃縮糖漿就可以防止埋蛋白質受到破壞喇～
