菲林機的類型大致可以分為135全片幅、120中片幅、110。市面上較common嘅35 x 24mm 135全片幅都有36、27、24張選擇,如果用半格相機就可以影雙倍相片數目,新手不妨嘗試135菲林先~
120中片幅就有12張正方size底片,56 x 56mm 嘅尺寸亦都係135全片幅嘅3至4倍。佢適合用喺不同中片幅相機,可以影出不同尺寸同格數,彈性都幾高!
而110菲林尺寸就夠哂迷你,得13 x 17 mm,但ISO選擇就只有100、200、400揀。不過啱用嘅相機就只有口袋size嘅110相機,光圈較細,所以好多人用嚟玩下算,唔會太追求相片質素。
ISO方面,比較常見嘅有100、200、400、800、1600,ISO越大感光度就越高,適合喺暗嘅環境,不過要留意粗粒都會較多。裝好咗菲林都記得較返相機上嘅ISO設定呀~
另外成日入相機舖都會聽到「谷沖」呢個term,其實就係指你買咗一筒低ISO嘅菲林,但又想佢感光能力再高啲,就會喺相機設定較高啲ISO,然後影完用藥水沖耐啲,令佢曝光多啲,不過畫質都會相應低啲,黑白菲林則問題不大。
菲林又有分正負片,一般沖曬嘅價錢都會唔同。正片色水上會飽和啲,對比度高,適合影風景、人像等,不過要求好嘅精準曝光;負片色調淡啲,寬容度又高啲,即使唔夠曝光或過分曝光出來啲相都唔會話好核突,衰在偏色啫。
同埋依家好多菲林舖都已經scan到變電子檔,再up上Google Drive俾你,所以唔需要擔心post唔到你嘅作品上網。至於底片,一般舖頭都會幫你keep 1-2禮拜,歡迎攞返留念!