近年大家越嚟越關注網絡安全嘅問題,過於簡單嘅密碼都係一個嚴重嘅安全漏洞,大家嘅個人資料等於暴露晒喺網絡當中。最近密碼管理程式NordPass公布2020年最差密碼排行榜,當中頭10位嘅最差密碼入面,大部份只需少於1秒嘅時間就可以破解,快啲睇吓你用緊嘅密碼夠唔夠安全啦!
2020年最差密碼排行榜頭十位分別係「123456」、「123456789」、「picture1」、「password」、「12345678」、「111111」、「123123」、「12345」、「1234567890」、「senha」,其中8組密碼只需少於一秒就可以破解,可見過短、連續嘅純數字密碼雖然方便易記,但就非常唔安全,大家都係唔好貪方便啦!
值得留意嘅密碼係排名第三嘅「picture1」,因為密碼係由數字同英文字組合而成,所以需要3個鐘較長時間破解。但都有371,612名用户常用呢組密碼,加上密碼本身嘅英文字母排序係有明顯意思,較比人易撞中。
另外排名第十嘅常見密碼「senha」,都有167,728人用,破解時間只需10 秒,因為密碼本身嘅意思係葡萄牙語嘅密碼。
機構建議,大家set密碼嘅時候花多啲心思,避免用純數字、類似按鍵組合、過短嘅密碼。如果無頭緒點set複雜嘅密碼,或者驚set啲太複雜嘅密碼會記唔住,都可以考慮用吓密碼管理軟件。
資料來源:NordPass