無論食得幾飽,相信大家食完飯之後都會再想食甜品。今次就嚴選左三間良心小店俾大家,佢哋嘅甜品全部落足料,芋圓仙草、麻糬窩夫、心太軟全部都大大碗抵食又好味!相信作為甜品愛好者,試完之後一定一試難忘!係疫情期間外賣好選擇,令大家可以安在家中食黄店~
Tarone希望甜品可以帶給客人滿滿的幸福感覺,所以佢哋每日都用心製作,選料嚴謹,甜品即叫即整,保持新鮮感。最受歡迎嘅甜品非芋圓系列莫屬!芋圓有煙韌既口感,顏色鮮明,仲有四種口味俾大家揀,包括芋頭、紫薯、蕃薯、南瓜。賣相又IGable 味道又唔係好甜~
足料芋圓仙草,每樣配材都煮得岩岩好,好味又大碗,性價比十分高!每次既水準都保持到,所以舖頭經常出現人龍。
地址: 香港大角咀角祥街48號
營業時間 : 3:00 -11:30 pm
位於元朗嘅文青甜品舖,以簡單潔白嘅裝修為主。店內最出名就係高質雪糕麻糬窩夫。原味窩夫看似平凡,外層金黃香脆裏面鬆厚綿密加埋麻糬軟糯煙韌口感豐富, 食落一啲都不平凡!呢到嘅窩夫有種神奇吸引力,唔少客人都一試返尋味。
另外,百利甜酒朱古力心太軟都十分吸引,一切開朱古力漿就流出嚟,軟硬適中更帶點百利甜酒嘅醇香,味道意外地夾~ 而且製作時間相當之快,約十分鐘就上枱了。
地址: 元朗馬田路20-30B號安寧大廈地下4號舖
營業時間 : 16:00 – 01:00
人氣甜品小店,以堅持甜品當飯食的原則。不少人推薦開心果心太軟配乳酪雪糕係必食嘅!開心果味道既心太軟好少見, 外面皮脆焗得啱啱好,配埋開心果同開心果醬一流,更乳酪雪糕伴碟,食落味道夠曬新鮮,一甜一酸幾特別~另外芒芋亦都不錯,細細碗但勁足料,芋圓、地瓜圓、紫薯圓、小丸子、水晶珠、芒果粒同奶凍全部有齊,啖啖芒果甜香,奶凍滑身而芋圓類煙韌,口感豐富。
地址: 大角咀嘉善街18號利奧坊二期地下G703號舖
營業時間 : 15:00 – 00:00
(Photos from OpenRice)