冬天必備冷衫是常識，每次花大錢買完一件質地靚又保暖嘅冷衫，洗冷衫總係會好驚，因為唔知下一次仲著唔著到，今次教你3招保養方法，次次出街都著得靚一靚。
1. 用啱產品
無可否認洗冷衫真係要比平時花更大嘅心機去洗，你件冷衫真係價值不斐，建議買返專洗羊毛同茄士咩嘅洗衣液，咁就萬無一失。但真係件冷衫已經縮咗水，否以試下用護髮素加清水洗，可以令冷衫嘅纖維軟化、膨脹，但係隻隻護髮素裡成份都唔同，最好就買返專用嘅產品啦！
2. 清水常溫手洗
洗冷衫真係冇得偷懶，話就話可以機洗，但永遠出嚟都係會縮水，真係唔好再畀佢呃啦！勤力啲要手洗，如果正常出街冇咩污漬，用清水已經洗走大部分灰塵和污漬，就算天氣凍都好，都唔可以用暖水，記得要用常溫水清洗。
3. 冷衫要平曬
冷衫吸水力勁，一濕水就會變重，再掛衣架上去晾乾好易變形。最好就用多知衣架平放舖乾，洗完就先擰乾或者用毛巾吸乾水，再拉一拉返正常嘅形狀，特別留意手袖位要平均放好，好易曬乾之後會變成「長短手」。記得唔好太陽直曬，曬乾後都要平放摺好，廢事因為本身冷衫嘅重量而慢慢拉長咗件衫。
最後嘅最後，當然洗衫要留意個洗衣標籤，而且冷衫真係唔好成日洗，減低縮水嘅機會，買專用嘅清洗噴劑，去走表面嘅異味就可以啦！
