繼早前一股社交媒體「移民潮」之後,最近一個主打語音功能嘅社交媒體Clubhouse討論度極高,相信大家身邊有唔少朋友都開始用緊。到底實際上有咩功能、點樣開account?等小編幫大家實測下啦!
Clubhouse 暫時只係支援IOS系統,而且呢個平台以邀請制運作,要邀請碼先可以加入,每個用戶最多只可以邀請兩個新用戶。
大家喺申請account嘅時候,需要填上你嘅電話號碼,系統就會發出一個驗證碼。
成功申請之後,大家就可以設定icon,等你嘅朋友更加容易認得你。之後就可以按自己嘅喜好,選擇唔同嘅類別,包括有影相、運動、美容、美食、國家、語言等,呢啲類別會幫助系統為你介紹志同道合嘅朋友。
系統會為大家推介各類型嘅對話,大家可以按自己喜好選擇想收聽嘅對話。大家亦都可以自行創建房間,建立一個專屬嘅話題。如果想開放比任何人一齊討論,可以將房間設定為公開形式。如果只係想同朋友討論,可以設定為半公開或者封閉形式。
有別於Mewe、Facebook、IG呢類社交平台,就算大家做緊其他嘢,用Clubhouse都可以好似聽電台咁樣,輕輕鬆鬆就聽到大家傾緊嘅話題,亦都可以「舉手」要求參與討論。Clubhouse仲支援後台功能,離開咗應用程式版面,都可以繼續聽到大家討論緊嘅對話,唔會阻住大家做嘢呀!