氣炸鍋算得上近年嘅熱門電器,全因佢操作方便,手殘人士都可以煮到超高水準嘅食物。二嚟因為疫情,被迫留係屋企,氣炸鍋就真係好重要啦,臨近新年,喺屋企休息定同親朋好友見面點少得小食嚟餵飽佢哋呢,4款氣炸鍋小食食譜馬上送上。
1. 薯條
家庭聚會又或者屋企睇戲點少得薯條,嫌落街買上嚟食好快淋,自己煮一樣好容易。
食材:薯仔、黑胡椒、鹽、橄欖油
第一步:薯仔去皮,切成長條形狀(好似平時係餐廳食到嘅size)
第二步:將薯仔浸喺水,防止氧化變色同洗走多餘嘅澱粉
第三步:浸完第一次嘅水,搓一搓個表面,倒走啲水,再重新浸乾淨嘅水,加少少白醋,靜置15分鐘
第四步:將薯仔放入煲煮,水滾後轉細火,再煮6-7分鐘,直到薯仔呈小小透明(半熟狀態),就起鍋
第五步:撈起嘅薯仔,要瀝乾吹涼,或者拎紙巾印一印表面,吹20-30分鐘
第六步:倒適量橄欖油,要撈均佢哋
第七步:放入氣炸鍋,用200度炸10分鐘,拎出嚟望下有冇上色(金黃色),如果仲未上色,就每次炸多5分鐘就拎出嚟睇睇上色未。
第八步:最後就趁熱加黑胡椒粉同鹽調味,加芝士都非常正!
2. 烤金針菇
每次去BBQ都必整金針菇,有咗氣烤鍋就更加簡單易做,夜晚加餸好選擇。
食材:金針菇、食用油、辣椒粉、生抽、蠔油、糖、鹽、黑胡椒粉、蒜泥、白芝麻
第一步:將金針菇去根/泥洗乾淨,吸乾水分,分開成一撮撮
第二步:喺氣烤鍋鋪一層錫紙,喺表面薄薄上一層食用油
第三步:將金針菇均勻舖好表面
第四步:調個汁,2匙生抽、1匙蠔油、少少糖同鹽、適量白芝麻、少少黑胡椒粉同食用油、跟個人喜好加蒜泥羹
第五步:180度炸5分鐘翻一翻面,都係跟個人喜好喺金針菇表面灑一層辣椒粉,再炸5分鐘
第六步:倒上岩先嘅調汁,就大功告成
3. 蜂蜜栗子
冬天點少得栗子,熱辣辣又香嘅蜂蜜栗子,啱晒一邊吹水一邊食。
食材:板栗、蜜糖、白糖、清水
第一步:將栗子洗乾淨,用廚房紙索乾啲水
第二步:拎刀喺栗子表面戒開十字
第三步:將蜜糖、白糖、清水,用1:1:1嘅比例溝勻
第四步:喺氣炸鍋舖錫紙,放上栗子,2/3嘅蜜糖汁同栗子攪勻,淨低嘅1/3用個刷涂喺栗子個十字開口位
第五步:180度炸15分鐘
香甜好食嘅蜂蜜栗子大功告成!
4. 日式可樂餅
呢個唔好以為好難整,其實做法簡單,不過材料有少少複雜,屋企附近冇Donki嘅朋友不妨試下自家製。
食材:2個薯仔、5片煙肉、半個洋蔥、3隻雞蛋、麵包糠、栗米粉、芝士、蕃茄醬、沙律醬
第一步:薯仔去皮切片蒸熟壓成泥,洋蔥同煙肉切粒
第二步:熱鍋用油炒香洋蔥同煙肉粒,加1匙調味酒、1匙生抽、少少鹽同黑胡椒粉碎,撈勻炒香,然後再同薯仔泥攪勻
第三步:將攪好嘅薯仔泥,包芝士喺中間,搓成橢圓形(好似平時食可樂餅個樣)
第四步:依次裹上栗米粉、雞蛋液、麵包糠,再放入炸鍋
第五步:180度炸15-20分鐘
簡單拉絲日式可樂餅完成!