元朗出名多黃店餐廳,專誠入去食完餐廳點少得甜品店呢,元朗甜品舖同樣叫好又排長隊,以後入到元朗唔洗淨係記得某間英文字母嘅甜水舖啦!
1. 原點
每次喺元朗食完飯,一定要去原點叫返個牛乳燒仙草先會返屋企,呢間店嘅menu超多款,啱晒成班朋友食完飯下場食糖水,大家都可以叫到自己鍾意嘅糖水。基本每樣甜品水準偏上,價錢中等。要叫筆者介紹一樣必食糖品,除咗超煙韌芋圓外,百利甜酒朱古力心太軟都係必試,佢嘅酒香唔會太出,啱啱好融合喺朱古力,中和咗啲甜味,質感都好順滑。
地址:元朗馬田路20-30B號安寧大廈地下4號舖
電話:62335322
Instagram:@here.dessert
2. 滔滔甜品
呢間甜品店好多地方都有分店,特別係元朗,基本上每去食每去都要等位,真係一定會介紹畀更多人認識。同原點唔同,佢就偏向中式甜品多啲,但都有唔少融合嘅甜品,例如招牌嘅叄元豆花,如果你同筆者一樣係芋圓怪,佢嘅芋圓真係好值得一試,特別係包心芋圓,有唔同嘅餡料,真係粒粒都真材實料。
地址:元朗康樂路8號康樂廣場地下9號舖
3. 香蕉仔
作為屯元天嘅子民喺IG都見到唔少朋友打卡,自從上年話唔做,真係令唔少人超傷心,好彩嘅係佢翻嚟啦,仲要喺返原址開店,同樣排隊嘅人超多。而呢間店就係主打來自泰國嘅名物香蕉煎餅,香蕉超足料,而且一咬落去真係外脆內軟,成晒成個真係超滿足。鍾意nutella嘅朋友,都可以試下nutella香蕉煎餅,多咗nutella奶味重咗,但確實會甜好多,鍾意食甜嘅朋友就啱晒。
地址:元朗大坡頭徑14-24號福星樓地下6號舖
電話:90933771
4. 好豆製研究所
比起上面完全喺甜品,呢個有少少踩界,因為佢係豆乳飲品,奶珠奶茶就開到成行成市,豆乳製品嘅店真係唔多,筆者就好怕啲豆乳會有假奶味同死甜,但呢間第一次飲真係畀咗唔少驚喜我,全因佢比傳統豆漿嘅味濃好多,但又有牛奶味係入面,感覺似改良版嘅豆漿,但確實比平時飲嘅豆漿好飲太多,入口又滑,仲要濃豆香。唔單止原味,仲有抹茶同芋頭味,而筆者我每次必飲係特濃豆乳,個豆奶香會再濃同「結」身啲,唔少朋友食完好飽都要買返枝飲!
地址:元朗鳳翔路63號金馬大廈地下12號舖
Instagram:@ beanlabhk