只要行過菲林舖嘅人,一定會見過放喺舖頭角落頭、用個紙皮箱裝住嘅一堆過期菲林,望落點都冇貨架上嗰啲用盒裝嘅咁靚仔。你可能會諗堆菲林都過咗期,究竟仲有咩賣點?咪就係一個字:平!通常啲菲林舖都會用低過原價三成至一半不等放出去。如果你都想試玩下,咁就要留意以下幾點:
- 夜媽媽冇嘢睇
用過期菲林最大嘅concern一定係效果,而最影響效果一定係ISO!ISO即係感光度,數值越大代表感光度越高,簡單嚟講就係越適合喺黑暗環境入面影相,詳情可以睇睇我哋嘅入坑新手包。而菲林過期之後上面嘅化學物質會退化,感光度亦會隨之減弱,出現白化、蒙查查。本身喺夜晚冇閃燈下影正常菲林已經難,所以小編絕對不建議大家喺夜晚影過期菲林~
2.將佢雪雪雪
Kodak官方建議將未影過嘅菲林雪喺13°C或以下,就可以減慢菲林退化嘅速度,不過過期菲林就唔可以雪太耐,因為有可能令菲林凝結。要影嘅時候記住早至少半個鐘攞出嚟降到室溫,避免佢出水點。
3.較低ISO
平時用單反機就要視乎返卷菲林咩ISO再手動較,用傻瓜機佢識得自動調節更方便;但影過期菲林就唔同喇,例如過期2-3年嘅菲林ISO要較低1-2級,假設佢係ISO 400就要較低至200或100,ISO 200嘅話就要較低至100或50,如此類推。另外都可以因應嗰陣嘅環境,調較快門慢啲同光圈大啲嚟配合。
但始終唔知筒菲林過期幾耐、以前係點樣保存,好難講要較低幾多,願意博下嘅話,嘗試較低啲啲ISO,等佢曝光耐啲,影到嘢嘅機會越大。
4.谷沖補飛
所謂谷沖即係延長菲林沖曬嘅時間,慢慢將佢嘅光度推高,但同時都會將相片顆粒放大,就算影到嘢可能都好矇。谷沖幾多級一般視乎你本身調低幾多ISO,ISO冇較過咪谷沖返多少少,至於點樣拿捏真係講一半經驗一半彩數;又或者穩陣起見,攞筒過期菲林去舖頭沖嘅時候,可以直接同店員請教你嘅情況,等佢俾建議你啦。
其實過期菲林蠱惑過啲女人,一句講哂,要影都唔好重要場合影!