小編閒時執屋會發現好多買嚟諗住遲啲用得著、結果用唔著嘅嘢，所以就會上網上拍賣交易平台Carousell賣咗佢，費時造成浪費，或者大家做freelancer窮到褲穿窿都可以幫補下。但係呢個體驗不得不令我感歎呢個世界無奇不有，所以小編想分享下自己少少心得，希望大家借鑑借鑑。
1.圖靚大過天
有陣時放出去賣可能係啲有牌子嘅嘢，唔想煩咪直接cap返官網張圖，但其實最好有實物圖，望落去先可靠啲。而一張靚嘅product相係會大大吸引撳入去嘅機率，假設影出嚟個背景係你Hello Kitty床單，配合鬆郁矇嘅攝影技巧，再唔小心影埋你個倒影，你樣嘢幾新淨都冇人想欣賞。搵個淨色背景、有充足日光光線、擺得靚靚地、影多幾個角度已經好好多，作為Freelancer有執圖經驗嘅你，仲可以執下光鮮少少添，但要注意唔好P到有色差。
2.貨物資料越長越好
貨物資料越詳細越好，要人估估下自自然然減低買家意欲，或者下下都inbox問都麻煩到你自己。花少少時間寫下貨物嘅背景，例如贈品、人哋送用唔著等等，反而顯得你誠實，買家又唔使驚你件嘢有咩問題，可以令人放心買。
3.標價都要格價
另外標價時可以參考其他同類貨品嘅價錢，甚至喺你標價嘅時間Carousell已經提供咗建議售價。但總有啲人樣樣嘢都鍾意講價，明明全新三折賣仲要講價，如果你已經覺得係底線最好列明不設議價，或者交收地點、時間、運費等等條件改得都可以寫明。
4.起好個題贏咗一半
不妨花時間諗下人會search嘅keywords同你件貨嘅特點，例如牌子名、顏色、款式、「全新」，甚至中英有齊都得，善用下產品分類，都可以大大增加俾人睇到嘅機會。
5.心急是沒有用的
其實like越多你件貨越有機會置頂，所以避免貪快而求其upload啲嘢上去，亦都唔好有人inbox你約交收時就手快快標註為賣出，因為標註咗賣出之後就唔會再search到，如果到時有咩冬瓜豆腐賣唔出，咁你件貨又少咗曝光機會。
6.交易細則先小人後君子
正如上面提到有啲人用Carousell買嘢真係冇乜交帶同責任心，所以最好事先撳入去睇下佢個底，可能買家已經放過其他人好幾次飛機，你就要衡量下；最緊要講明如果幾時過唔到帳，或交收當日如果幾點鐘都未有回覆就視為放棄交易，避免佢拖你數、你又冇得賣出去住，甚至no show。
其實除咗放上網賣咗佢，有啲唔要嘅嘢都可以選擇捐俾有需要嘅人，希望幫助到弱勢，為自己積下福，阿們。
