近日歐美地區繼Clubhouse後又牽起另一個社交APP熱潮，今次唔係開Chatroom傾計，而係用手機同朋友一齊影菲林相，快啲睇下Dispo點玩！
Dispo 係近日啱啱喺歐美創科市場嘅炙手可熱嘅社交APP，可以同你嘅朋友互相分享用APP影完嘅相，同share俾喺個人profile俾朋友睇，但暫時只係IOS限定。佢仲同Clubhouse嘅註冊模式好似，要有邀請碼先用得，而每個人最多只可以send 20個邀請俾朋友。
註冊時要輸入手機號碼或者連Apple ID、Snapchat 帳號。
再入佢發送俾你嘅SMS認證碼。
始終個APP仲好新，如果大家好似小編一樣未有朋友俾邀請碼你，咁就只能乾等了～
好彩有朋友嘅你登入後，就可以開始影。首先要撳右上角建立菲林底片，然後選擇用咩菲林同改名。不過唔知係小編手機個別問題定點，喺呢度似乎唔太支援到中文輸入法，打中文淨係出到啲筆劃、倉頡碼，會出唔到個字。
之後可以開始影喇！佢就好似平時玩開嘅菲林相機APP一樣，影完相第二朝9點先出到相。小編試過偷雞將手機時間較快一日，都逃唔過佢法眼！
特別嘅地方在於你可以同friend子share用同一卷菲林，就真係好似用緊同一部即棄相機。入面可以好似Instagram 咁經營profile、俾Like、Comment同follow人，個相簿仲可以設定埋Private定Public。佢有得share去Facebook、WhatsApp、Signal等通訊APP，IG或其他圖片APP就冇得share。
不過目前佢喺海外仲集資緊，所以只有Beta版本了。
