最近身邊朋友出街總係拎住部一次性菲林相機影個不停，返去search先知而家一次性嘅菲林相機勁hit，因為佢夠平之餘，有時想影啲有feel啲有年代感嘅相，並唔係用部手機就可以代替。如果你都心思思想買部玩下，但又唔知每部一次性菲林相機影出嚟嘅效果係點，又或者啱係咩場合用的話，即刻同你比較下，揀部啱自己心水嘅菲林相機啦！
1. FUJIFILM SIMPLE ACE 400
呢款相機簡直就係未聽過佢個名，都見過佢個樣，可以話係各界文青手執一部。400感光度，32mm焦距的鏡頭 f10 光圈，快門1/140秒，出嚟效果懷舊味濃，只要冇陽光嘅情況下，就一定要記得開閃光燈，否則影出嚟會好黑，突出唔到主體。我會建議影人像比影風景嘅成色更靚。
2. Kodak Daylight
如果鍾意相片效果復古感強，同呈現出嚟日系溫暖感，呢款都係好選擇。全因佢ISO（感光度）去到800, 不過呢款一次性嘅相機係冇閃光燈，所以確保影嘅時候一定要有陽光，亦都因為咁，所以廢片率好低，最啱去郊遊個陣影風景，陽光之下影人像都有一種日系詩意嘅感覺。
3. Candy camera
韓星們都用嘅一次性相機，令到佢名聲大噪，可愛嘅糖果色外形，難怪收獲唔少少女fans。ISO400, 35mm嘅焦距，都係常見嘅一次性相機設定，唯獨佢出片感覺現代一啲，冇咗菲林片嘅古舊感，而且顏色偏冷調，影冬天嘅景色，或者本身景象同物件冇咁鮮豔就最好。
4. Lomography Simple Use
呢個simple use系列有4部唔同成色嘅相機，分別：Lomography 400 彩色負片、黑白菲林、 LomoChrome Purple 紫色負片及 LomoChrome Metropolis 冷調負片。最多人買都係彩色負片，佢嘅彩色負片比起其他幾款包和度高啲，同時出嚟效果會黃調啲，但係就比較考技術先影到靚相，比較講求個光線，但總體佢都係景同人像都啱用，但要記得冇陽光嘅環境就要開閃光燈（真實血與淚嘅教訓）。
其實每部一次性嘅菲林相機嘅感光度同焦距都差唔多，只係差在菲林影出嚟嘅色調，以上就係同大家比較出嚟嘅差別，多嘗試就搵到自己嘅number 1 。
