新年剛過冇耐,喺屋企過嘅新年想必一定食得更加變本加厲,而家仲要諗辦法補救。唔想做運動自然就由飲食落手,但下下都唔食嘢對身體唔好,不如試下用健康啲嘅方法,即係用水果蔬汁榨或攪拌成汁,朝早飲又或者下午茶時間飲去增加飽腹感,全部都係幫助身體排毒同清腸胃,再配合適量運動就事半功倍。以下飲品製作方法都非常簡單,將蔬果洗乾淨,加入水或牛奶或乳酪喺拌攪機打成液體就可以啦。
1. 香蕉火龍果奶昔
如果你係時常因為飲食習慣同作息唔定時所引起嘅便秘,可以試下呢個最強勁嘅組合,一條香蕉加一個火龍果,再加入適量嘅牛奶,最好係朝早配合早餐飲,潤腸功效強勁,但如果本身個人底子涼就唔好成日飲啦。
2. 奇異果芒果藍莓汁
味道酸甜超易入口,奇異果可以抗氧化而藍莓有美顏效果,芒果作調味,適合下午茶口痕想食嘢嘅時候飲。將奇異果、芒果、藍莓再加水便可,建議芒果可以唔需要落太多,可能會過酸或過甜,而芒果本身果糖含量都高,唔適宜落咁多。
3. 士多啤梨香蕉乳酪
士多啤梨其實對減肥有幫助,亦有好多營養,再加上高纖維嘅香蕉同有益生菌嘅乳酪,可以幫助身體排毒,做緊運動嘅朋友加埋嚟飲都好大益處。
4. 藍莓橙雪梨汁
呢個組合睇落好奇怪,但打埋一齊係好飲的,夏天嘅時候仲可以加冰粒落去,真係好消暑,而又做到排毒潤肺,但一日一杯或者幾日飲一次,因為呢3款水果果糖量都好高,飲得多反而會反彈。
5. 蕃茄仔蘋果香蕉奶昔
唔少人都分享過,蕃茄仔係減肥恩物,抗氧化而熱量又低,再加埋蘋果可以增加飽腹感,香蕉就會令個口感更加濃稠同排毒。可以揀係要食晚飯前嘅1個鐘飲,令到晚飯食量少啲,而有營養。
呢度都要提提大家,要減肥排毒唔係飲蔬果汁唔食飯就可以,要配合適當嘅運動,再加上以上蔬果汁嘅分量攝取大概每日350ml-450ml便可,飲太多係會適得其反,更要因應個人身體狀況去調整份量同材料,咁先係用正確方法減肥。