疫情下咁耐無得去旅行，講起去旅行大家第一時間會諗去邊度？日本？台灣？不如去一轉火星啦！NASA美國太空總署推出「SEND YOUR NAME TO MARS」計劃，免費比大家登記。雖然短時間內都無可能親身去到火星，不過可以率先比自己個名去一轉火星都幾有趣㗎！
大家可以按此進入活動網頁，簡單輸入自己嘅中文或英文名、國家/地區、區碼同埋電郵，就可以獲得一張飛往火星嘅機票，官方仲話預計2026年7月就可以起飛啦！
大家仲可以㩒「Frequent Flyer Club」，打返登記咗嘅姓氏同埋電郵，睇返已經儲落嘅「飛行里數」，原來去一轉火星已經有11億里㗎！
NASA會將收集返嚟嘅名儲存喺晶片入面，放喺未來發射上火星嘅探測器上，帶埋大家一齊探索火星。
㩒去「MAPS」就睇到全球已經有過千萬人登記，登記人數遍佈全球，睇嚟大家都心郁郁好想快啲去火星啊！
小編都幫「手停口停」申請咗張登機證啦，火星見！
