有時做完野已經半夜三更，肚空空就想食餐勁既獎勵自己。但係半夜三更，除左便利店同老麥之外，個腦又好似無咩主意。一諗起便利店果啲隔夜狗飯同老麥既24蚊餐，真係寧願食茶記二手飯。所以，當下我決定介紹幾間半夜都營業既餐廳比大家，以後半夜三更，就算食二手飯都多個選擇！
新香園
位於深水埗既茶記新香園，港式食品出色，價錢親民，確實係半夜覓食既好選擇。而佢最有名就係即叫即煎既蛋牛治，咸香既肉碎加上軟熟既烘底麵包，配埋杯港式奶茶，簡直叫人欲罷不能。
The Flying Pan
有時忙完一輪，真係想整返個早晨全餐比自己歎下，可惜老麥又要等到凌晨四點先有得食。好彩上天創造左廿四小時既 The Flying Pan，全日提供大份足料既all day breakfast止下口癮。想食清啲既話，可以選擇嗌沙律、燕麥呢類菜式，加埋杯即磨咖啡，真係會食到畢彼得上身：「早晨全餐，inevitable。」
一蘭
廿四小時營業既一蘭拉麵，向來都受港人歡迎。除左拉麵好食之外，佢既自閉式間隔啱哂我呢種毒拎一支公食，亦都可以獨自享受食好野既時光。不過一蘭始終太受歡迎，想食就要排下隊啦。
潮興魚蛋粉
想清清地食碗粉，潮興都係個唔錯既選擇。佢既魚蛋粉出名好食，彈牙爽口，半夜三更醫肚一流。不過就有評論指員工提供澳牛式服務，膽大既你可以去挑下機，比較下潮興定澳牛既服務「西」式啲。
睇完篇野，唔好話你，我都比自己搞到有啲肚餓，而家就落街食飯醫肚先。
