先前公布咗防疫措施放寬戲院畀7成人入去,又近復活節假期,當然要支持下本地電影業市場啦,4月份上映嘅5套電影,大人定小朋友都有一套啱睇。
1. 《殺神Nobody》 上畫日期:2021年4月1日
見到殺神唔好以為係Keanu Reeves嘅《殺神John Wick》嘅續集,但其實《殺神Nobody》係出自《殺神John Wick》編劇嘅手。內容係講一名謙遜嘅爸爸長期都只想過平凡嘅生活,直到一次屋企遇到歹徒入侵之後,就令佢有所改變,佢決定發洩自己心中壓抑嘅怒火而唔再忍氣吞聲。劇情節奏輕鬆又好笑,睇完冇咩負擔感。
2. 《STAND BY ME 多啦A夢 2》 上畫日期:2021年4月1日
仲記得睇《STAND BY ME 多啦A夢 3D》嗰陣真係喊濕兩張紙巾,今次係延續上集嘅故事。大雄突然興起想返到過去,睇吓已經逝世嘅嫲嫲,嫲嫲就表示自己希望見到大雄嘅婚禮。為圓嫲嫲嘅心願,大雄求多啦A夢帶佢到未來,偷睇自己同靜香嘅婚禮,竟然發現一件不可思議嘅事。我諗大家都係帶定紙巾入場會好啲。
3. 《真人快打》上畫日期:2021年4月8日
入場支持嘅原因絕對係因為溫子仁做監製,據指用咗成5年嘅時間去準備同寫劇本,而且改編作品成真人版,係選角同故事線都要花敢大嘅苦工,睇到選角都好貼近本身嘅人物形象,大多動作場面同血腥暴力相信都唔少得。
4. 《爸爸可否不要老》上畫日期:2021年4月8日
由兩大好戲之人影帝Anthony Hopkins與影后奧莉花高雯Olivia Colman同場飆戲,仲攞盡唔少國際大獎同提名,真係非睇不可。內容係話獨居嘅父親患上認知障礙症,但生性倔強,唔願接受女兒安排嘅協助同照顧,更唔願請看護,拒絕住老人院;一日一日咁過,父親嘅病情更加嚴重,女兒亦陷入兩難境地。一個貼地嘅劇節,一定得到唔少人嘅共鳴。
5. 《複製人徐福》 上畫日期:2021年4月15日
作為朴寶劍入伍前嘅電影,複製人徐福充滿科幻感,講述韓國特工接到國家級任務,原來係保護複製人,兩大男神孔劉同朴寶劍一齊上,女生們真係點能錯過啊!