係香港呢種步伐急速既城市生活，捱夜似乎已經係每個香港人既家常便飯。所謂飯可以唔食，女可以唔溝，但咖啡唔可以唔飲，作為一個經驗豐富既夜鬼，單靠飲咖啡點岀黎行走江湖。所謂捱夜真係易學難精怎可惡補，成日捱夜失敗既你，不妨睇下以下既入門級捱夜神器:
紅牛
個人經驗黎講，紅牛既效用都算堅過石堅。想當年我夜晚隊左罐溫書，竟然可以撐到朝早四、五點。過程中會不停打喊露，但精神上完全係醒神，毫無倦意，大腦運作極之良好。不過岀得黎行預左要還，效力一過，你既精神體力會嚴重透支，第二日要訓多兩倍時間補充返體力。諗返起我每次飲紅牛都會浮起食神入面田雞隊咳水個衰樣，可能陣味真係太易令人代入，甚至我懷疑田雞支咳水都好味過我罐紅牛。
Monster Energy
呢款美國生產既能量飲品，我會稱為紅牛2.0。功效方面同紅牛相近，飲後既四至六個鐘都非常精神，持久度算高。味道方面算係易接受既，但唔好有咩期望啦。不過勝在口味多，亦有無糖版，反正總有一款入到你口。
葡萄適
最傳統既提神飲品都莫過於葡萄適啦，古今中外男女老幼都啱飲。葡萄適主要係用大量葡萄糖刺激下你個大腦，如果要形容就好似打機開左外掛咁，但維持唔到耐。稍為提神既話確實係唔錯既選擇，但靠佢熬夜就難啲啦。
成日要捱夜既你，係時候入手翻幾罐能量飲品，以備不時之需。方法就比左你啦，最後我都戴翻個頭盔先，呢啲能量飲品必要時拎黎提神就好，長期依賴會有副作用，影響健康，記得適可而止呀！
