作為一個為生活打拼，日夜顛倒，手停口停既香港人，我絕對相信佢地將三分一既人工都用左黎買咖啡，隊紅牛。為左提神既你，呢種酗啡成癮既生活，仲後生就梗係覺得飲多兩杯無所謂。但長期依賴既話，啲牙黃哂都唔再講啦，皮膚差呢啲都無謂提，但傷胃同增加高血壓既風險就真係手尾長啦。
而家飲緊咖啡既你，係咪即刻嚇到瀨屎呢。唔使驚，你入得黎睇即係代表你都有興趣知道有咩野可以同樣達到提神既效果啦，放低你杯啡，睇下而家雪櫃有無呢以下幾樣提神食品啦。
堅果
有無諗過點解你成日都眼訓呀，除左咖啡因之外，身體缺乏足夠既鎂同鋅之類既礦物質都會影響你既精神，仲會影響工作情緒，表現都自然差啲啦。食返幾粒杏仁、開心果、核桃呢類堅果類食品，分分鐘個效果重爽過飲red bull。尤其係杏仁含有維他命B7,可以加快新陳代謝，將你身體既食物轉化為能量，從而令你更精神。而且當你食住堅果妹下妹下既時候，咀嚼既動作都會促進大腦增加血流量，從而提高記憶力同集中力。
香蕉
所謂飯後一碌蕉，快活過神仙（好似係除非唔係）。睇完上面嫌堅果貴或者唔鍾意食既你，唔洗急住上一頁住，不如食隻蕉冷靜下先。香蕉唔單止價錢大眾化，而且非常有益提神。香蕉當中既果糖、鎂同胺基酸可以令你放鬆心情，舒緩壓力。再者，香蕉含有大量鉀同纖維素，可以促進新陳代謝，提升埋專注力，令你既工作事半工倍，節節上升。
蘋果
夜媽媽食野怕肥既朋友，唔洗驚，蘋果係大廳。蘋果作為營養食品既表表者，除左低卡之外，當中既天然葡萄糖經人體消化後仲會帶有提神效果。而蘋果同時含有豐富既維他命C，有助增加紅血球將更多氧氣運行至全身，令你既大腦更加靈活精神。
所謂長命工夫長命做，各位為事業打拼既同事，都記得睇實自己既body。
係電腦面前既你，不妨試下放低杯啡，試下新既生活方式啦！
