有人話年輕一輩唔捱得,聽完真係笑而不語。係度睇緊既你,幾耐無試過十一點前上床?
不知不覺間,為左用盡每分每秒做野,犧牲訓覺時間成為大勢所趨。捱夜,逐漸變成一種生活態度。可惜,每每係夜闌人靜既時分,疲憊不堪既你,實在無法集中,無奈之下只好離開座椅,帶住幾分倦意走到窗前。凌晨時分既世界同你既大腦一樣,逐漸停止運作,你既眼皮慢慢加重…
經歷過以上情境既你,仲想係捱夜界立足既話,自己識睇埋落去啦。
補眠
想成功捱夜,補眠係一個唔錯既選擇。呢個世界好公平既,每個人既時間都一樣咁多,既然你想貪埋瞓覺既時間黎用,當然要利用翻中午或下午既時間補眠,咁你既捱夜歷程就唔會咁疲憊痛苦啦。捱夜呢家野同借錢一樣,都係要還㗎,你唔還你個身體都會代你還。所以知道自己要捱夜既話,預先瞓定一兩個鍾,包你夜晚精神爽利,做起事上黎都爽手啲啦。
食宵夜
半夜三更做野,飢腸轆轆既你,點忍到手唔煮返個宵夜慰勞下自己。但係都要食得聰明,先可以避免飯後飯氣攻心而搞到捱夜失敗。打算拎包營多出黎既你,唔該你收返埋啦,夜晚食咁重口味,我睇你都係想比個藉口自己瞓覺姐。而高糖分食物都可免則免,畢竟過高糖分會令你更加想瞓覺。做大事既你,麻煩你同我食返清啲,水果或者清淡小炒都係唔錯既選擇。懶煮既話就沖杯咖啡飲下啦,適量既咖啡因都可以封助你提神既。
適量運動
除左你最擅長既食同瞓之外,適當既小運動可以促進你既血液循環,令你成個人瞬間充滿返活力。當然,半夜三更唔係話叫你落街跑步打波咁痴線。其實只要係屋企,做些少伸展運動,甚至拉下筋,熱下身,徹底放鬆下啲肌肉,已經足似令你撐多一兩個鍾。
睇到呢度既你,恭喜你已經成為入門級既捱夜達人。至於未來既日子就靠你慢慢儲多啲實戰經驗啦。不過我都奉勸各位一句,捱夜就好似借錢一樣,越透支得多,將來要付出既代價就更大。只要唔好捱壞個身體,係捱夜界笑到最後果個,非你莫屬。