各位自己友平時同啲客溝通都會用email，不過同時跟幾個project，有時可能會有啲亂，忙起上嚟分分鐘唔記得咗幾時deadline。今次教大家輕鬆同步Gmail嘅內容去Google日曆，將啲schedule mark得清清楚楚，就唔怕做漏野啦！
呢個方法可以一次過同步所有電郵入面嘅活動，例如收到有關book枱食飯、開會、機票酒店嘅電郵，系統就會將資料自動同步去Google日曆。
首先登入Gmail，喺設定中揀選「一般」，開啟「智能功能和個人化體驗」及「其他Google產品的智能功能和個人化體驗」，就可以同步電郵嘅活動去日曆啦！
不過有時都會收到啲冇用嘅電郵，如果大家唔想將所有活動行程都同步去日曆，你可以選擇自己逐樣新增活動。
Click入想新增去日曆嘅電郵，㩒「加入活動」，系統就會將電郵中相關嘅資料，例如活動名稱、時間、地點自動填好，大家可以按需要補充番其他有關活動嘅資料，唔使逐項資料慢慢打慳返唔少時間！
提提大家如果想提高私隱度，可以打開Google日曆「設定」，㩒「Gmail中的活動」，再㩒「Gmail活動的顯示設定」，將日曆設定為「私人」或者「我自己」，確保只係得特定人士，或者你本人先至可以睇到日曆嘅內容。
