2021年過咗一半，大家做過啲咩？係咪乜都冇做過呢，今個6月就等手停口停工作室，幫大家整合提高工作效率嘅方法、嚴選自己友接Job實用嘅資源網站、集合Freelance必學貼士，希望幫到一眾在茫茫Freelance大海中浮沉嘅自己友早日上岸！
接Job想長接長有？做好自己個名好緊要，如果個客搵親你都搵唔到，夠鐘又交唔到貨，真係勸閣下返歸做「全職兒子/女兒」算啦。2021都過咗一大半，年頭講過嘅目標又做到幾多呢？拖延症嚟到年中，夠鐘好醫一醫啦，廢事遲下去到年尾，咩都冇做過浪費咗一年，真係喊都無謂。
BTW，唔知大家有冇留意，近日「躺平」一字網絡爆紅，意即香港人所指的「本䠋」。但個個都講「躺平」，唔通個個都想「躺平」咩？作為Freelancer，相信不少自己友聽到「躺平」一詞，都會露出「一早知啦」嘅老海鮮微笑。Freelancer可算是「躺平界」始祖，只不過是比較積極罷了。
拿拿拿，講多句，「躺平」絕對唔係指宅在家的隱青，純粹只係在競爭激烈的環境下，保持最低生存標準，一直保持低慾望、低消費的生活模式。話晒OT做到畀埋條命你，最後努力同回報都唔成正比，倒不如了解自己真正想做啲咩，根據自己的能力和興趣，選擇自由度較大嘅Freelance 工作啦。有網絡先知話，在躺平主義風氣盛行下，越來越多年輕人會加入Freelance行業。
不過Freelancer絕對唔係外人睇得咁Chill、咁Hea、咁風光。自己友一定有共鳴，做Freelance絕對係自制能力同意志力嘅大考驗。唔同返工，冇人會提你幾時開波，幾時做乜，時間分配好緊要，所有嘢都要自己安排，就連Job要自己接，數都要自己收（真係講追數起都想喊）。不過有樣嘢好，就係可以自己揀Job，唔想做嘅可以唔接，當然前題係你唔會餓死。想知點樣做Freelance事半功倍？Mon實我地手停口停工作室6月號嘅貼士啦！
▼▼點擊看Freelancer厭世語錄▼▼
