話咁快又到月中,差唔多近尾,大家開始做嘢/交貨未?作為Freelancer 最爽皮都莫過於可以自己決定幾時開波做嘢,但當然,可以Hea的話,又有邊個會郁?個個都話做得Freelancer都要好自律,但其實傳說中嘅自律,都只不過係同拖延症嘅自己,係腦入面做無限次鬥爭!傳說中,拖延症有N種人,你又係屬於邊一類?如果你係其中一種,就記得改吓喇!(咁易咩)
1. 扮晒嘢懶係完美型人格
呢個人格一定要加個「扮」字,因為想做得完美D呢一個念頭,永遠都只係停留緊去個「想」字到。明明心知Deadline就到,是時候開波,但總會同自己講「仲諗緊個好D嘅Idea / 諗緊點樣可以做好D 」 ,「畀多少少時間我,唔想交行貨」係口頭禪,真係點諗心知肚明啦…
2. 不屑接Job型
有另一種拖延症患者,佢高傲,但係宅心仁厚。其實接Job嘅時候已經睇唔起單Job,(如果唔係因為錢?哼!),心入面認為咁智障嘅要求,完全展示唔到佢神奇、頂級、超卓嘅Talent,接你Job真係浪費咗佢。所以一直都唔願做,自認為單手都搞得掂,倒不如Deadline前幾個鐘先做,對大師而言,輕鬆!
3. 掩飾真正實力型
有一種Freelancer,好似漆黑中嘅螢火蟲,咁鮮明,咁出眾。明白係呢個弱肉強食嘅社會,如果自己太出色,只會令其他人因為佢卓越嘅光芒而受傷。所以只好用拖延嚟逃避成功,驚太出色會遭人妒忌,只好遲D交貨,努力扮一個唔完美嘅正常人。
4. 化被動為主動型
接Job,係一種藝術。明知自己唔想做,但又驚宜家唔做以後冇得你做,(當然最重要原因都係因為窮啦),而被逼接一D自己心底裡唔想接嘅Job。連接Job都咁被動,有D咩係可以拎返個主動權,令自己有得揀呢?唯一嘅選擇就係揀幾交。有人話「拖延係權力的爭奪,是對被控制的不滿,對控制者的攻擊和報復」。嗯,大家點睇?
5. 富二代人間觀察型
做每一件事,都一定有原因有動機。而點解唔想做一件事呢?咪就係因為冇動力囉!接Freelance都係求財啫,再唔係就係想累積下經驗,儲下Portfolio為第時搵份好D嘅Job,一句講晒,咪又係求財!做Freelance係愛定責任啊?係窮啊!當錢都驅使唔到佢工作嘅時候,其實可能呢位Freelancer根本唔等錢使,只係富二代想體驗生活,撈唔掂就要返屋企繼承家業,呢D視金錢如浮雲嘅高級玩家,下次有Job都係唔好辛苦佢啦!
講咗咁耐,各位自己友肯開波/交貨未?要諗咁多大家唔想做嘢嘅原因認真唔容易。雖然一直宣揚金主大大請畀多D愛同鼓勵身邊嘅Freelancer,創造一個更美好嘅環境。但我哋都要「高抬貴手」,如果唔係成個Freelance業就會畀我地搞軭晒喇!