唔計疫情所致既「在家工作」(Work From Home),自由身工作者Freelancer、斜槓族Slash聽落好似係近年先興起既新工作模式,其實秘撈接Job呢啲野由來已久,恐怕得字眼係聽落新鮮。近日網上有文章指唐代詩人李白當年Freelance寫首《贈汪倫》(七言絕句,total 28字)怒賺約值53萬的財物,筆者見到立即兩眼發光,心想一字原來不止千金,係可以值近萬九蚊(53萬除以28)!但當筆者認真考古,發現根本唔係咁既!(大失所望)
時代背景
根據網上資料,《贈汪倫》約為公元755年(天寶十四年)李白遊涇縣(今屬安徽)桃花潭所作。同年十一月安史之亂爆發,可見當年時代動盪,絕非太平盛世。當年李白準備去廬山隱居避禍,因為退休縣令汪倫盛情邀請所以赴約,同汪倫度過左幾日開心既時光,傳說中價值幾十萬既財物(名馬八匹、官錦十緞)是汪倫臨別所贈,又在古岸閣上設宴送別。李白臨別,船正要離岸嗰陣,回頭見到汪倫在岸上踏步唱歌為自己送行,深深感激汪倫的盛意,於是寫下《贈汪倫》一詩。
賺錢同接濟傻傻分不清楚
由此可見,以上行為絕非詩詞買賣交易,說不上李白幫汪倫Freelance寫首《贈汪倫》(其實條題都話咗係送㗎啦)係為咗賺取名馬和官錦。汪倫係退休縣令,李白約12年前都做過翰林院供俸,但官場失意,做咗兩年就唔撈了。時值安史之亂即將爆發,李白冇工作,社會環境又唔穩定,汪倫欣賞李白才情之外,喺李白走難前送咁多物資俾佢,比起出糧,明顯更似友情接濟。
做公務員,有爽有唔爽
李白於公元743年做過翰林院供俸兩年,起初獲唐玄宗禮遇,但臨劈炮之前,兩方關係已經疏遠。按照網上文章所計算,李白從官六品收入實在唔錯。但佢係自己第二年就唔撈,而唔係俾人炒,可見錢買到佢個人,但買唔到佢個心。到安史之亂爆發,李白更因「從逆」罪被判流放夜郎(今貴州桐梓)。
如果淨係講錢,李白最風光一定係打工做公務員既日子,筆者完全搵唔到李白Freelance寫詩發左達的佐證,安史之亂後,李白更是靠人賑濟為生,晚境淒涼。自己友自古以來原來都窮,李白都不能倖免。🚬🚬🚬