天文台今日一度發出黑色暴雨警告信號，如果有自己友唔好彩要出門，對鞋分分鐘濕到可以扭出水，若果要見客，真係尷尬到不得了！咁嘅情況小編都經歷過，等我教大家8個急救乾鞋方法！
1.塞報紙、紙巾 入去吸水定型
塞報紙唔單止可以支撐對濕咗嘅鞋，報紙嘅吸水能力仲可以令到對鞋快啲講添！如果你對鞋係白色擔心報紙會整污糟佢嘅話，都可以將報紙換成麻雀紙！如果呢兩樣都冇嘅話都可以考慮用廚房紙，但係值得一提嘅係千祈唔好用好溥嗰啲廁紙，如果唔係成對鞋入邊都會有好多碎碎！
2.用吹風機
相信好多人都會直接攞個風筒吹入對鞋，但係咁樣係會影響對鞋嘅內部結構！所以一般比較貴嘅鞋都唔會建議用吹風機！但係危急關頭可以用一個紙袋或者膠袋，剪一個窿等啲風可以喺嗰個位吹入對鞋入面，等對鞋慢慢烘乾。
3.解開鞋帶、拿出鞋墊
如果想對鞋快啲乾，就一定要解開鞋帶同埋攞個鞋墊出嚟，等佢哋可以快啲風乾！咁樣做仲可以減少霉菌嘅生長！減少滋生臭味！
4.立起來晾乾
將一對濕咗嘅鞋直立式咁樣放起晾乾，佢哋嘅接觸面積會比較少，所以仲會快乾過平放嘅鞋！
5.皮鞋要放入鞋楦
如果皮鞋入水嘅話吸乾水份之後應該要放入一個鞋楦防止對鞋變形！跟住就可以幫對鞋上一次鞋油，再放喺通風處等佢自然風乾。過兩三日之後再上一次鞋油，咁樣對鞋就會好似新嘅一樣 ！
6.乾燥劑、除濕劑
對鞋差唔多乾嘅時候，大部份人都係等放喺度等佢自然風乾。咁樣做嘅話殘餘係鞋入面嘅水份就會開始發臭！所以對鞋差唔多乾嘅時候可以放一啲乾燥劑入去，等對鞋徹底風乾。
7.蘇打粉
相信大家都知道梳打粉可以除臭！大家可以將梳打粉倒入一個袋入面，再將佢哋放喺對經過處理嘅鞋入面。咁樣做嘅話就算呢對鞋曾經嘅淋濕，臭味都可以減少好多！
8.咖啡
除咗梳打粉之外，曬乾左嘅咖啡渣都可以用來除臭。同樣將佢哋放喺隔渣袋，放入鞋入面，就可以達到一個除臭嘅功效。
