個個都Google Search，唔通個個都識用Google Search咩？不論係文書工作定係搵圖，自己友工作必用Google Search！不過每次由搵到搵到自己啱用嘅搜尋結果，每次都搵勁耐先搵得中Point。記低以下5招實用Google精準搜尋秘技，幫你每次Google Search都慳時間兼提高效率！
1.「”」精準搜尋
由於Google Search為咗更加人性化，更方便用家，就會根據User嘅語境同語法去進行分析，簡單D嚟講，即係Google Search嘅結果唔會100%對照User嘅字去Search，而係去估User大概嘅意思。所以Google Search嘅搜尋結果，好多都係唔關事，User未必需要嘅資訊。其實只要加上引號「”」，就可以縮小搜尋範圍，更精準搜尋，會容易D搵到你要嘅資訊。
2. 「-」排除相關字眼
教完點樣搵Exact關鍵字，就輪到學點樣排除唔想要嘅字眼。大家日常生活總會遇到好多撞名嘅事物，例如「後來的我們」可以係五月天首歌，都可以係套劉若英執導的電影，如果想Search有電影《後來的我們》嘅結果可以點呢？可以係「後來的我們」後面加減號「-」，例如「後來的我們 -五月天」。所有有關五月天首歌後來的我們都唔會顯示，大大縮短搜尋到啱用資料嘅時間。
3. 萬用符號「*」
如果有時候想Search一樣嘢，但係又記得一半唔記得一半，唔記得Exact Wording可以點算呢？呢個時候就要用萬用符號「*」去代替你唔記得嘅Keywords，搜尋引擎會自動填補關鍵字中所缺失嘅部分，幫你搵到想要嘅資料。例如要Search《浮誇》歌詞，淨識唱「….問我我就會講但是……」，唔記得頭尾歌詞係咩，只要Search「*問我我就會講但是*」，就會Search到「有人問我我就會講但是無人來」。
4. 多個關鍵字搜尋「OR」
如果想Search嘅關鍵字有多個別名，就可以用「OR」去搜尋。例如想Search「香港大學」，又想見到有「港大」，「HKU」嘅字眼，可以用「香港大學 OR 港大 OR HKU」去Search。另外，亦都可以用「|」符號代替OR，一樣有相同效果。
5.「..」範圍搜尋
如果想Search一段範圍內嘅資訊，例如價錢或年份範圍，都可以係數字之間加上 2 個小數點「..」, 可以限定Search到資料嘅時間範圍。例如只想Search 2010到2020年嘅施政報告，可以用「施政報告2010..2020」去搜尋，結果只會顯示10年間嘅施政報告內容。
