7月4號開始可以登記領取政府電子消費券，雖然夾埋有$5000咁多，不過都有消費限制。另外，大家可以揀用八達通、AlipayHK、WeChat Pay HK或者Tap & Go拍住賞拎。即刻睇有咩可以買，有咩唔買得啦！
消費券可以喺接受支付寶香港、八達通、Tap & Go「拍住賞」及WeChat Pay HK嘅本地零售、餐飲，同埋服務業商戶嘅實體及網上店舖。例如便利店、零售店、百貨公司、娛樂設施、去超級市場同街市買餸、去餐廳食飯、飲咖啡、做Facial、搭車等都用得㗎！
聽落好似好多地方都用得，不過消費券都有限制，唔可以用喺政府、公用事業、公共機構嘅收費同埋學費。即係交稅、罰款、牌照費、隧道費、停車咪表、水、電、煤氣、中小學、大學學費、醫院管理局、香港房屋委員會、香港房屋協會嘅帳單都唔可以用消費券交。
另外都唔可以用嚟購買金融產品或服務，例如保險、股票、基金等。用嚟捐款都唔得㗎，包括捐比慈善、宗教及政治組織都唔得。今次政府話要刺激本港經濟，所以都唔可以直接向非本地商戶買嘢。直接轉送比其他人，或者兌做現金都係唔得㗎！大家記得睇清楚係點用啦！
睇埋呢篇就知揀邊個支付工具好：【消費券】網購應該用邊間？ 邊間唔使身分證都申請得？ 四大支付工具比拼
