都市人日夜奔波,肩頸膊痛已經再唔係老一輩既專利,好似我咁先廿頭已經成身藥油味,已經手停口停仲要忍住荷包痛俾錢睇跌打。勞損問題越黎越年輕化,想要返個健康既body,就要從日常生活入手啦。
呢排天氣轉涼,除左拎定平安鍾之外,唔少人都預備定頸巾保暖。但長期纜住頸巾,都會令肩膊承受不必要既重量。久而久之,就會做成肩頸膊痛。所以怕凍既朋友,記得到室內就除左條頸巾,比個膊頭休息下。
另外,個人習慣例如唔吹頭係肩頸痛既成因之一,尤其係留長髮既人。濕髮長期搭落膊頭既話,會令到膊頭吸收過多濕氣,而形成阻塞經絡既狀況,影響肩膀既血液循環。所以平時沖完涼,記得吹返乾個頭。
而日常姿勢絕對係勞損既主因,例如長時間低頭玩手機,或者長時間對住電腦,令到肌肉長期處於拉扯狀態,從而形成勞損。所以平時應該定時做返少許伸展運動,舒展下筋骨,先可以減低勞損既機會。
其實只要平時做啲簡單既拉筋運動,就可以大大減低肩頸痛既機會。低頭族既你,可以試下「米」字拉筋。只要將頭向上,下,左,右移動,之後再向上斜,下斜,左斜,右斜輪流移動,咁就可以有效幫你既肩頸舒展。
受緊肩頸痛折磨既你,千祈唔好忽視肩膊痛既嚴重性呀。長此忽視既話,可能會造成骨刺,手麻痺,頸椎炎等等既問題,到時就真係手尾長啦。所以,對你個膊頭就好似對條囡咁,平時錫佢多啲,唔好再比你個膊頭承受咁多啦。