上集睇完70至90年代奧運吉祥物嘅設計,同大家睇埋21世紀嘅設計,今屆東京奧運吉祥物仲要係日本小學生投票揀出嚟,踏入新一個世紀,大家又滿唔滿意吉祥物嘅造型呢?
今屆東京奧運吉祥物MIRAITOWA象徵未來和永遠,本來有3組候選組合,最後由日本小學生投票選出MIRAITOWA組合,但有評論就話C嘅組合較適合,大家又點睇?
你以為澳洲會用最代表性嘅袋鼠同無尾熊做吉祥物?咁就錯啦!2000年澳洲雪梨奧運有3隻吉祥物,分別係笑翠鳥「奧利」(Olly)、鴨嘴獸「悉德」(Syd)和針鼴「米利」(Millie)。當年推廣Green sports,所以就用左稀有嘅澳洲生物結合環保精神。不過呢三隻動物咁稀有,唔講都唔知咩生物。
2004年雅典奧運會吉祥物係兩隻叫做雅典娜費同埋沃斯嘅公仔,佢哋頭細、頸長、身大、腳大,原來係根據古希臘陶土雕塑玩偶「達伊達拉」設計,大家接唔接受到呢種設計?
2012年英國倫敦奧運想帶出科技感,推出吉祥物「文洛克」,得一隻眼、身體係金屬,有人話搞到好似外星異形咁。
2016年巴西里約奧運係第一次喺南美洲舉辦嘅奧運會,吉祥物「維尼休斯」結合貓、猴子、鳥,「湯姆」就展現出雨林嘅豐富性同埋植物嘅生命力量,有人話有啲似寵物小精靈喎!
今次講埋2008年北京奧運福娃嘅其餘3個「詛咒」,代表藏羚羊的黃色福娃「迎迎」引來西藏流血事件,頭頂風箏的綠色福娃「妮妮」引來風箏之鄉山東省大型火車相撞事件,頭頂紅色火炬的「歡歡」導致火炬傳遞遇阻。有人將一連串災難日期的數字相加,都等於中國人數字的「8」,咁啱當年北京奧運會開幕時間定為8月8日晚上8點8分,真係咁啱得咁橋?
睇埋上集70至90年代嘅吉祥物:東京奧運|近10屆奧運吉祥物冇隻靚? 京奧福娃準確預言中國5大災難 外媒:它們被詛咒了