各位自己友如果想開公司，當然唔少得開返個公司戶口，有人話過程如同過五關斬六將，文件少份唔得，信用唔夠又話唔得。究竟要成功申請一個戶口，又有咩秘訣呢？
1.基本程序
公司負責人開設戶口既時候，需要準備「公司章程」，「商業登記」同「公司註冊證明」副本比銀行職員查冊。查冊大概兩日至一星期內完成，視乎唔同銀行而定，費用約$120，亦係根據唔同銀行有不同。
2.行政費
部分銀行可能會要求客戶交「查冊費」或行政費，費用甚至高達$2,000，但又唔代表申請一定成功。所以記得要問清楚收費準則，以免支出過大。
而「商業登記」及「公司註冊證明」文件都係重要一環，例如在「商業登記」中，公司「業務性質」(NATURE OF BUSINESS) 標示為「CORP」，就可能會以客戶公司業務不清晰為由而被拒絕審理。甚至有創辦人因為未有辦公室，用自己居所作為「商業登記」的工作地址，呢種情況銀行都有權拒絕受理。
3.業務往來
銀行亦需要了解你既公司同客群，證明公司係有實質既業務，唔係空殼公司。你可以搵有穩定業務既公司幫手，又或者聯絡有關既商業銀行職員打人情牌幫你通過申請。如果無相關人脈既話，都可以向潛在客戶遞交公司既計劃書，作為公司有實質運作既證據。
4.所需文件
– 商業登記證 (BR) 和公司註冊證書 (CI) (有限公司)
– 商業登記證 (BR) 和 商業登記冊內資料摘錄(FORM 1(a)/FORM 1(c)) 的核證本(無限公司)
– 近期財務報告（如有）
– 公司組織架構
– 關於業務的合約證明文件
– 產品資料（如有）
– 公司地址證明
最後比多個小貼士比大家，如果有員工既話，可以承諾銀行職員幫襯買勞保或強積金等，除左可以提高申請機率外，亦證明左公司有業務運作，不妨考慮一下。
