一講到新年，最令人頭痛既事就係同啲三姑六婆拜年食飯。表面上係普通既團年飯，但飯局接踵不斷既提問先係關鍵。應對得唔好，翻屋企又比屋企人嘈，真係少啲心力都唔得！今日就醒翻大家幾招，等你今個新年可以有備而戰！
返緊咩工呀？
親戚既眼中，只有打工仔同唔做野既廢青。一聽到你做freelance就認定你係游手好閒。
呢個時候只要老實答佢：「我而家做緊高級編輯，你睇緊啲廢文咪平時我寫㗎囉！」
只要將你接開既job吹大啲，最好chok d title 出黎，一定可以拋窒到佢地！
幾錢人工呀？
新年又點少得人比人環節，對於手停口停的自己友黎講，有時根本唔係面子問題，而係根本月月收入都唔同，點答啫！呢個時候最好巧妙咁答佢：「唔係話好多既，夠食夠用，一年夠同屋企人去幾次旅行，買幾個名牌咁囉。」
婉轉得黎帶啲攻擊性，相信佢地都唔會再敢追問。
有男朋友／女朋友未？
感情狀態永遠會勾起佢地既興趣，對於一眾單身狗黎講，唔洗驚，亦唔洗心虛！你可以咁答佢：「對象當然唔缺啦，不過而家事業為上先，感情既就隨遇而安啦！」
咁既回答顯得你事業心重，就算單身都只係你選擇既狀態，得體大方，好過果啲淨識溝女唔識做野既MK親戚多多聲！
希望以上幾招，可以幫大家保平安，安全渡過呢個新年啦！
