香港人成日手機不離手,無論做嘢定係休息嘅時候都要用到電話,原來手機放喺邊都有學問。大家應該避免將手機放喺以下呢五個位置,就可以避免意外發生,即刻睇吓點樣可以用得安全啲啦!
1. 避免將手機放喺太熱嘅地方
大部份手機都有安全機制,喺手機過熱嘅時候會自動將螢幕校暗、降低效能、停止充電甚至自動關機等。但長時間將手機放喺溫度過高嘅地方,例如沙灘等陽光直射嘅地方,有機會永久損壞電池,降低電池嘅耐用程度。
2. 避免將手機放喺床
相信唔少人都習慣喺臨瞓前用手機,但手機嘅藍光會影響大家嘅睡眠質素,加上將手機放喺床上,咁啱瞓覺嘅時候手機響亦會影響睡眠質素。另外,如果一路瞓覺一路充電,並將手機放喺床上,亦有機會導致電池過熱。
3. 避免將手機放喺褲袋
好多時候大家為咗方便,都會將手機放喺褲袋。事實上將手機放喺褲袋,一方面容易整唔見,另一方面更會引起姿勢或者背部問題,影響身體健康,亦有研究顯示有機會影響男性生殖健康。
4. 避免將手機帶進廁所
眾所周知去完廁所沖水時,糞便同細菌有機會傳播到廁所每個位置,將手機帶入廁所有機會令手機佈滿細菌。另外喺廁所用手機亦有機會令手機入水而損壞。喺今年12月,俄羅斯一名女子更因為唔小心將充電中嘅手機,跌入有水嘅浴缸,而觸電身亡。為咗衛生同埋安全,大家去廁所嘅時候,都係盡量唔好用電話。
5. 避免直接接觸面部
唔係啩?手機點樣唔掂落塊面啊?由於手機會發出輻射,應該避免長時間放喺頭部附近。有研究顯示,手機上面嘅細菌仲多過座廁表面。大家記得定期清潔手機,或者可以用藍牙耳機聽音樂、講電話,減少讓手機直接接觸面部。
資料來源:iDropnews
圖片來源:pixabay