電腦係各位自己友嘅搵食工具,save 咗好多晚捱更抵夜爆曬肝嘅作品,如果一個唔小心del咗好緊要嘅檔案,真係欲哭無淚。為咗避免咁恐怖嘅情況出現,今次為大家推介免費嘅資料復原軟件,就算錯手Del咗啲檔案,都可以盡快救翻,慳返唔少時間啦!
EaseUS有中文版本、操作簡單,就算唔小心刪除咗文件、格式化咗SD卡,都可以即刻搵返唔見咗嘅檔案。只需要用APP掃描,就可以預覽所有內容,再恢復指定嘅檔案。DOC/DOCX、XLS/XLSX、 PPT/PPTX、 PDF、JPG/JPEG、 TIFF/TIF、 PNG、MOV、 MP4等嘅檔案類型都修復到。
Piriform Recuva隸屬捷克防毒軟件公司Avast旗下,主打強大嘅硬碟掃描功能及低CPU消耗率,好快就可以搵到想要嘅檔案,盡快將唔見咗嘅資料搶救返。
Ontrack係一個綜合型自助式數據復原軟件,可以用嚟復原固態硬碟 (SSD) 到 RAID 磁碟區。意外刪除的檔案、資料夾、文件、相片及影片等內容,以及損毀、受損、被刪除或格式化的磁碟區嘅檔案都搵得返。免費版最多可以復原1GB嘅資料。
Wise data recovery只需要㩒一個掣就可以掃描成個硬碟,之後再打關鍵字搵返想要嘅文件,唔使逐個文件check,大大加快進度。仲可以睇住復原文件嘅進度,預覽已經檢測到嘅文件。
Recover My Files Professional 可以處理到FAT、NTFS或OS X HFS嘅硬碟,功能相比起其他程式豐富,可以揀想掃描邊一類型嘅文件,慳返掃描嘅時間。