各位自己友平時做嘢都常用到Photoshop,今次教大家3個喺Photoshop選取物件嘅方法,同大家比較下3個方法分別適合用喺咩地方,邊個方法又係最好用呢?
首先開咗你想要嘅相先,長㩒「套索工具」就會出現3個選項,分別係套索工具、多邊形套索工具同埋磁性套索工具,「套索工具」嘅快捷鍵係「L」。
「套索工具」相對上比較少用,因為好容易手震而唔準,圈到出晒界效果好一般,如果只係整個大約嘅草稿,唔使太精準嘅話先好用啦!
「多邊形套索工具」就好用啲,大家可以按需要放大張圖,逐下逐下mark靚啲轉角位,瑕疵都少好多㗎!不過相對上需要較長時間,練多幾次就會快啲。
「磁性套索工具」就係沿住主體嘅邊圈出嚟,要注意嘅係如果主體顏色唔夠突出,又或者唔小心手震,選取出嚟可能都唔夠準。
如果選取出嚟唔滿意,大家可以用快捷鍵CTRL+D取消選取,重新選取想要嘅範圍。