IKEA每年都出版產品目錄，呢個傳統不經不覺已經超過70年。而最近IKEA將歷代嘅catologue數碼化，全部上載到網上博物館，免費開放俾人重溫室內設計演變過程！最近裝修嘅不妨攞下靈感，不過IKEA同佢門口一樣色，大家睇咗當買咗好喇～
入到去可以喺左上角揀返你想睇嘅年份，雖然網站上只有瑞典版，不過睇圖都一樣咁精彩～
IKEA五十年代出嘅第一本catalogue只有十幾頁，仲係黑白色同人手畫，係之後嗰幾年先至有彩色印刷。而傢俬都好有華麗嘅感覺同年代感，特別一啲掛牆鏡、鐘、木櫃等等都好著重雕刻。
近年興起復古懷舊風，鍾意pattern嘅可以睇睇六十至九十年代間，格仔、花花呢類田園小清新風格望落都幾樸素舒服。
而想玩下花款，可以揀深色木傢俬、亮面皮梳化，同花紋地氈、窗簾等等都幾特別。
今時今日IKEA嘅catalogue已經變得好詳盡豐富，亦都係室內設計一個唔錯嘅參考。不過呢種懷舊風格一個唔小心消化得唔好，好容易變成娘……
