每個自己友必定會經歷報價比客嘅階段,報得太高又怕個客唔揀你,報得太低又委屈自己。同客傾價錢其實都係一場心理戰,捉到技巧就唔怕再比人壓價啦!即刻睇下點樣報價先啱啦!
1.了解對方可接受嘅價錢範圍
正所謂:知己知彼,百戰百勝。第一步就係要摸下對方嘅底,睇下對方有幾多預算,不過好多時客仔都會話唔清楚市價,叫你自己報。呢個時候你可以講一個range嘅報價,話喺一般正常嚟講嘅市價,測試喺對方嘅反應,睇下對方預算有幾多。
2.捉住想有優惠嘅心態
平時去買嘢見到有特價都會特別想買,同樣地可以用喺同客仔報價上,例如個job你係想收$2000嘅話,不妨由$2200開始報,等對方有少少講價空間,客仔講價成功覺得自己賺左,你又可以得到心目中嘅價錢,何樂而不為呢?
3.遇到好多預算嘅客仔
如果客仔對你一提出嘅價錢已經好滿意,甚至高過你嘅報價,呢啲機會真係可遇不可求,你都可以額外送啲服務比佢,令佢留下深刻印象,之後有job都可以搵返你,建立長期合作關係。
4.切忌做爛市
Freelancer做嘢並唔係㩒兩下電腦、畫兩、三張圖咁簡單,如果對方嘅預算真係太太太太太低,就應該同佢講返正常要做嘅工序,比佢知道你嘅工作唔係想像中咁簡單。真係傾唔掂嘅話可以禮貌地請佢搵其他人報價,唔好下下硬接咁低嘅價錢,長遠落去客仔只會繼續㩒低你個價,真係做爛市啦!