新年就快到,疫情期間冇得同朋友見,只好留係屋企盡情食去安慰自己弱小嘅心靈。不論有冇同朋友見面,新年肥幾磅都真係好容易,而家Gym房仲要冇得開門,想減肥都冇減。不過呢樣絕對唔係藉口,前排hit 完動森嘅Switch可以拎返出嚟玩啦!推薦5款Switch上面玩嘅減肥遊戲,喺屋企都可以做運動!
1. Just Dance 2021
鍾意跳舞嘅朋友,呢隻Game真係點都聽過,就算唔鍾意跳舞嘅朋友,跟住屏幕嘅小老師郁都好簡單,收錄咗40首近呢一年嘅hit曲,而家買game仲會送30日Unlimited嘅會員,咁就盡情跳足收錄500首嘅歌,程度簡單,普通至困難,依照自己程度,認真跟住音樂跳真係會流晒大汗,仲會幫你紀錄燃燒熱量同運動嘅時間。
2. Fitness Boxing
玩Boxing減肥見效大家都略有所聞,呢款遊戲就好似出面嘅拳擊課程咁,跟住遊戲入面教練嘅動作,就可以做到拳擊訓練!唔好以為好hea,佢有分正常同快速程度,比少少力度去出拳,第二日會感受到手臂嘅酸痛,仲可選擇每日鍛練嘅時間,計埋BMI同每日燃燒卡路里,成個私人教練咁mon住你。
3. ZUMBA Burn It Up!
睇開社交媒體都留意到好多明星會跳ZUMBA嚟減肥,因為一邊跳舞,一邊做有氧嘅動作,我哋未必有錢請教練嚟學ZUMBA,但呢款Game就幫到你,佢就好巧妙地將健身訓練同娛樂融合,有「單曲」、「完整課程」、「健身派對」3種模式,有31首歌,舞步嘅種類同風格都可以揀。特別留意係四肢真係極到唔協調嘅朋友,唔好怕佢係跳舞性質,但動作都係有氧為主,並唔太難,絕對可以一試。
4. Mario Tennis Ace
Mario系列為主嘅體感網球Game,唔好睇少佢,以為拎住個Joy-Con 郁個手臂去擊球好小兒科,遊戲入面有5種擊球方式,連姿勢都會計埋一份,開Game玩返幾局,隻手實係會酸到舉唔起。留意玩遊戲個陣真係要做足熱身,唔係好易整親條腰。(小編都中過招!)
5. 運動派對
屋企人多個陣,想玩啲郁動得嚟又可以多人玩嘅Game?呢款就啱啦,有籃球、滑板同沙灘排球等嘅運動,係足不出戶嘅情況下感受戶外活動嘅遊戲,最適合三五好友或家人一齊比賽,玩法簡單,作為正式嘅遊戲就未必夠喉,但朋友玩下都幾盡興。